❤️في دورة من دوراتي
واحدة من الامهات المشتركات
كان تعليقها إنها حبتني آكتر و استفادت أفضل
في الحضور المباشر
عن الاونلاين
ودا طبيعي جدا
لاختلاف شخصياتنا وانماط تعلمنا
ففيه شخصيات بتتعلم آكتر من خلال التفاعل والنقاش والحوار
ودي أكيد طبعا الحضور المباشر هيكون أفضل من الاونلاين
وفي شخصيات بتحب تسمع المعلومة آكتر من مرة بدون أي تدخلات أو نقاشات
هي بتحللها وتناقشها مع نفسها وعقلها الداخلي
وفي شخصيات بتتشتت بسرعة بوجود افراد وناس حواليها
فأكيد الشخصيات دي هتفضل الدورات الاونلاين
كل حاجة لها مميزات وعيوب
الحضور المباشر
🌳مثلا من عيوبه
تكلفته اعلي ووقت ومجهود في توقيت محدد
وكمان مقدرش ارجع للمحاضرة واسمعها تاني
لو غبت في محاضرة مقدرش اعوضها.....
🌳وله مميزات كثير زي التفاعل والنقاش والالتزام وسهولة السؤال وغيرها.....
بشكل عام الحضور المباشر أفضل من الاونلاين ونسبة الاستفادة منه بتكون اعلي
🌳الاونلاين برضه
له مميزات وله عيوب
مميزاته بيكون أرخص وسهولة الرجوع المحاضرات في أي وقت وتكرار المحاضرات وبشوفه في البيت ومش بضطر انزل والتزم بوقت محدد
وبقدر احصل علي محاضرات ودورات مش متاحة في محيط سكني وكمان بقدر احصل علي دورات من بلاد مختلفة وبيشغل وقت الفراغ بدل تضييعه علي الفيس ....
🌳ومن عيوبه
عدم وجود تفاعل ونقاش كثير وعدم الالتزام بوقت محدد
وعدم وجود صحبة للتشجيع والدعم
والاسئلة مش بتكون في أثناء المحاضرة
وسهل اننا انسي المعلومات
وبيحتاج تحفيز ذاتي من الشخص لنفسه دائما
وسهل جدا اننا اشعر بالملل وأنا بسمع المحاضرات.......
❤️❤️❤️
طيب بما اننا معظمنا بنضطر في أحيان كثيرة اننا ناخد دورات اونلاين
حتي وإحنا عارفين اننا مش هنحقق منه الاستفادة الكاملة زي الحضور المباشر
هقولكم على شوية حاجات بعملها لما أخد دورة اونلاين علشان أزود نسبة استفادتي من الدورة
1- بمسك ورقة وقلم واكتب إللي فهمته أو الملاحظات إللي استنتجتها
مش بكتب المحاضرة بنفس الكلام المذكور بحيث اننا لما أحب استرجع المعلومات أقرا الملاحظات والجمل البسيطة إللي كتبتها مش ارجع للمحاضرة ساعتين ( في ناس بتفضل إنها تكتب كل كلمة ودا بيرجع لكل واحد شايف هيستفاد إزاي أكثر)
2- لو في نقطة أثارت انتباهى أو تساؤلي بكتبها في الجزء الخاص ب المخططات التعليمية القادمة ( علشان متشتتش بكتب في آخر الكشكول العناوين أو الموضوعات إللي حابة أقرا فيها أكثر أو اشوفلها فيديوهات)
3- بعد المحاضرة أحاول انفذ إللي اتذكر ولو متوافرش دة بسجل لنفسي كاني بشرح لحد علشان المعلومات تتخزن في الذاكرة الدائمة
4- بحدد لنفسي وقت محدد في الاسبوع أشوف فيه المحاضرة كاني هروح احضرها حضور مباشر
يعني مش بحط مواعيد أو التزامات في الوقت ده من الاسبوع ( وبحط كمان يوم احتياطي لو حصل ظرف في اليوم الأساسي)
5- بحاول أشوف من المشتركات واحدة مميزة واحاول أكون علي تواصل معها للتشجيع والدعم ( لو مش متوفر في الدورة نقاشات جماعية أو عدم التزام من المشتركات في سماع المحاضرات فبالتالي مفيش تشجيع ودا مشكلة معظم الاونلاين إنه بيحتاج تحفيز ذاتي من الشخص نفسه لإن حتي القائم على الكورس مش هيروحله بيته ويجبره يسمع المحاضرة)
وفي أفكار مختلفة على حسب كل دورة ❤️❤️
كل هذا يتم إذا اعجبتنى الدورة من الاساس لأن كثيرا من الدورات الأونلاين هي مجرد نقل فقط
❤️
عايزاكم أنتوا كمان تشاركوا بافكاركم إللي بتستخدموها علشان تستفيدوا أكثر من الدورات الاونلاين
وكل عام وانتم بخير 💓💓💓
ليست هناك تعليقات:
إرسال تعليق